قلعہ ایوبی

قاہرہ میں ایک جگہ اسلامی تاریخ کی تین بڑی مساجد اور قلعہ ہے چونکہ یہ جگہ شہر سے اونچائی پر واقع ہے اس لیے اگر باقی شہر کو تماشا گاہ یا اسٹیج تصور کیا جائے تو یہ جگہ بالکونی کہلائے گی ۔یہاں قلعہ سلطان صلاح الدین ایوبی ،مسجد علی مملوکی ،مسجد رفاعی اور مسجد سلطان حسن کی خوب صورت عمارات دیکھنے والوں کی آنکھوں اور ذہن و فکر کو خیرہ کرتی ہیں۔قلعہ ایوبی عظیم سپہ سالار سلطا ن صلاح الدین ایوبی نے گیارہ سو چھہتر سے گیارہ سو تراسی عیسوی میں شہر کو عیسائی حملہ آوروں سے بچانے کے لیے قاہرہ شہر کے قلب میں بنایا تھا ۔مسافر نے دکتو ر محمود سے اس قلعہ کی اہمیت کے بارے میں پوچھا تو کہنے لگے قاہرہ شہر اور یہاں کے باسیوں پر سلطان صلاح الدین ایوبی کے بہت سے احسانات ہیں۔ اس شہر اور اہلِ شہر کو صلیبی جنگوں میں یورش پسندوں اور ان کی یلغاروں سے بچانے میں اس قلعہ کا بہت بڑا کردار ہے ۔مصری حکمرانوں نے تقریباََ سات صدیوں تک اس قلعہ سے اہلِ قاہرہ کی حفاظت کی ہے ۔

قلعہ ایوبی کی دیواریں دس میٹر لمبی اور تین میٹر چوڑی ہیں ۔خود سلطان صلاح الدین ایوبی نے اس قلعہ کے اندر ایک گھر ایک مسجد اور ایک لائبریری بنوائی تھی ۔مسافر کو صلاح الدین ایوبی کی یہ تعمیرات اچھی لگیں فرزندانِ تثلیث کے خلاف جنگ کر نے والے جرنیل کو جسمانی لحاظ سے پر سکون رہنے کے لیے ایک محفوظ گھر قلبی سکون کے لیے ایک مسجد اور ذہنی سکون کے لیے ایک لائبریری سے بہتر انتخاب کیا ہو سکتا ہے ۔بلاشبہ دنیا کی امامت جس کو درپیش ہو وہ ان تین جگہوںکے بغیر نامکمل اور منتشر شخصیت کا مالک ہو گا ۔ قلعہ تو اپنی جگہ موجود ہے مگر مسجد،لائبریری اور گھر ناپید ہیں ۔شاید مسلمانوں کو اب نہ دنیا کی امامت درپیش ہے اور نہ  ہفت کشور تسخیر کر نے کے لیے تیغ و تفنگ درکار ہے ۔