براعظم افریقہ کی پہلی مسجد

براعظم افریقہ کی پہلی مسجد بھی قاہرہ میں تعمیر کی گئی تھی ۔یہ مسجد فاتح مصر حضرت عمرو بن العاص ؓ کے نام سے موسوم ہے ۔رومیوں کو شکست دے کر اس عظیم جرنیل نے حضرت محمد ﷺ کی وہ پیشین گوئی سچ ثابت کی جو آپؐ نے جنگ خندق میں کھدائی کے دوران اس بڑے پتھر کو توڑتے وقت دی تھی جس کا توڑنا صحابہ سے ممکن نہ تھا ۔خلیفہ وقت حضرت عمر ؓ نے حضرت عمر و بن العاص کو یہاں کا گورنر مقرر کیا ۔تقریباََ گیارہ ایکڑ کے احاطے پر مشتمل یہ مسجد افریقہ کی بڑی اور وسیع ترین مساجد میں شمار ہوتی ہے ۔ابتدا میں یہ ایک چھوٹی سے مسجد تھی جو اسلا م کی پہلی مسجد، مسجد قبا کی طرح کھجور کے درختوں پر تعمیر ہوئی تھی ۔ مگر اب یہ ایک عالی شان مسجد ہے جس کو دیکھنے دنیا بھر کے سیاح آتے ہیں ۔