ملک حنیف دی شاعری بارے کجھ اکھر
میں ملک محمد حنیف نوں بڑے عرصے توں جاننا ہاں۔ویسے تے ایہ وکیل وی نے پر ہومیوپیتھک ڈاکٹری دا شغل وی رکھدے نے لیکن اصل اوہناں دا شوق تعلیم تے ادب نال اے۔پنجابی تے اردو ادب نال بڑا ڈونگا لگائو تے شعر دی پرکھ وی اوہناں وچ کمال دی اے۔گل گل تے شعر بولنا تے کئی واری موقع دی مناسبت نال نظم تے غزل لکھنا اوہناں دا کمال اے۔وکالت چھڈ کے تے وزیر اعلی مانیٹرنگ فورس وچ اون دا سبب اہناں دی آزاد منش طبیعت دا حصہ اے۔کتاب ’’دکھاں دی پنڈ‘‘اوہناں دی زندگی دا نچوڑ معلوم ہوندا اے تے کتاب نوں پڑھدیاں ہویاں انج لگدا اے جیویں ہر دکھ میرا اپنا ایں۔
دکھاں دی پنڈ ہوئی تیار

کھول کے ویکھیں اس نوں یار
اوہناں نوں پنجاب دیاں رسماں دے گھٹ جاون دا وی بڑا دکھ اے۔ لکھدے نے
حقے وی نے گھٹ دے جاندے

ایڈیاں کج ادائیاں ہویاں
ملک حنیف صاحب دی شاعری ساڈے شہر جڑانوالہ دے ادبی حلقے واسطے ہک تحفہ اے۔امید اے کہ اوہناں دی کتاب اوہناں دے ناں نال ہی امر ہو جاوے گی۔ملک صاحب اپنے تہذیبی ورثے دے ایڈے پکے نے کہ اوہناں نے اپنی کتاب دا ناں ’’دکھاں دی پنڈ‘‘وی آپے ہی تجویز کیتا اے۔آکھدے نیںجیویں پروین شاکر دی کتاب ’’خوشبو‘‘دی ہر غزل وچ خوشبو دا لفظ آندا اے ایویں میری اس کتاب دیاں غزلاں وچ دکھاں تے درداں دا ذکر ضرور ہوے گا۔میری محبت اوہناں نا ل اتنی ہی پرانی اے جتنا اوہناں دا ادبی ذوق پرانا اے۔مانیٹرنگ فورس دی ساری ٹیم وچوں زیادہ تعلیم یافتہ نے ،تے لکھن پڑھن دا ذوق وی زیادہ رکھدے نیں۔امید اے کہ اوہناں دی ایہہ کتاب پنجابی زبان دے شوق رکھن والیاں ادیباں نوں بڑی پسند آوئے گی۔میں پی۔ایچ۔ڈی(اردو)دا اسکالر ہون دے ناطے اتنی گل ضرور کھولنا چاہنا ہاں کہ اردو زبان دی ماں وی پنجابی زبان اے۔اردو زبان نے وی پنجابی زبان وچوں جنم لیا اے پر ہن انج معلوم ہندا اے۔
پنجابی لکھنا بولنا گھٹ ہویا

لگدا پیا اے بے وطن ہوگئی
ان شاء اللہ جس وقت تک حنیف صاحب ورگے پنجابی ادب نال محبت رکھن والے لوک زندہ نے پنجابی ادب گھٹ دا نہیں بلکہ ودھدا جاوے گا۔
عبدالرزاق چوہان (پی۔ایچ۔ڈی اسکالر)