پھلاں دی کیاری
ملک حنیف دے کلام وچ درد ہجر ،فراق تے دکھاں دی کٹاری جگہ جگہ نظر اوندی اے۔جیویں کہ کتاب دا ناں ’’دکھاں دی پنڈ‘‘ رکھیا گیا اے۔دکھ ،دردتے قضیے سارے کلام وچ کھلرے پئے نے۔
تیرے ہجر دیاں میں سر تے

کنیاں بھاریاں پنڈاں چائیاں
جدائی دا ذکر وی کئی تھاواں تے بڑے سوہنے انداز نال پیش کیتا گیا اے
ہن محبوب کدی نہیں ملدے

پئی جدائی سالاں والی
محبوب دے ملن دی آس امید دے پھل تازے نیں،بڑے حوصلے نال آکھدے نیں۔
آخر سجن ملسی آ

کجھ دیہاڑے ہور وی تگ
حالات حاضرہ دی جھلک وی نظر اوندی اے تے پتا لگدا اے بھئی شاعر ماحول تے سیاست توں بے خبر نہیں۔
نویں پاکستان دا نعرہ

ویکھو تیل تے تیل دی دھار
مہنگائی توں عوام بڑی پریشان ایں تے غریب تے مزدور لوک بیچارے مہنگائی دے بارے ہی سوچاں سوچدے رہندے نیں۔
کیوں مہنگائی دا رونا روئیے کوسیے کیوں حکومت نوں
روٹی جے کر پکدی ہوے سوہنی پنج ست جیاں دی
مولی دھانے تے گنگلو گاجراں ایسیاں شیاں نے،جنہاں دی پنجاب دے وچ کوئی تھڑ نہیں۔سبزی ترکاری لیندیاں ہویاں چٹی سفید مولی تے ساوے کچوچ دھانے دوکاندار اینویں ہی ہتھ پھڑا دیندے سن تے ہن کی حال اے۔
مولی دھانے مہنگے ہو گئے

زور دیاں مہنگایاں ہویاں
پنجاب دی ثقافت دے جلوے وی نظر اوندے نے۔
پنڈاں اندر نہیں اے رونق ،رکھاںا تے شریہاں دی
لسی چاٹی والی مکھن ،نہیں خوشبو اے گھیاں دی
انج تاں ہر قسم دے موضوع اہناں دے کلام وچ ملدے نے،پر خاص طور تے درد وچھوڑا تے تصوف اے۔
ب بندوق چلا غماں دی آپ گیوں کتھ جائی اوئے
نین وکھا نشیلے کجلے اگ برہوں دی لائی اوئے
ہجر فراق تے وچھوڑے اندر کیویں وقت گزردا اے ایہ اوہ جاندا اے جس دے نال بیتی ہوئے۔
ہجر ساڑ دتا دکھاں مار دتا ،بھج وانگ کباب دے ماس ہویا
درد اں مشق پکائی وچھوڑیاں دی دل ڈھگیاں وانگ خراس ہویا
ہک ہجر ساڑے دوجا غم مارے جھوٹے دیوندے لوک تسلیاں نی
ہک پلک وی یاد نا بھلدی اے بیٹھے دل وچ مار پتھلیاں نی
عشق مصطفیﷺ دے جلوے وی لاٹاں ماردے پئے نیں۔
ہن برکتاں درود سلام دیاں

میلے دلاں دی سمجھ صفائی ہوئی اے
ولضحی چہرہ ولیل زلفاں

رحم دلی وی سنگ بدن ہو گئی
تھوڑا پڑھ درود توں بھانویں

بخشے رب ثواب زیادہ
میری دعا اے کہ اللہ ہور وی اوہناں دے جوہر کھولے تے ہور وی لکھن دی توفیق عطا مرماوے۔
رائے صحبت اللہ
گورنمنٹ ہائی سکول لنڈیانوالہ