دساں کی حساب، حساب دے وچ
دکھ لکھیا پیا کتاب دے وچ
اوسے نور دا مڈھ ظہور ہویا
جیہڑا چمکدا اے آفتاب دے وچ
برہوں ہجردے وچ میں گئی بھنی
سیخاں ہوندیاں جیویں کباب دے وچ
ہووے غلطی جے کوئی معاف کرنا
خط لکھیا گیا شتاب دے وچ
اکھیں تکدیاں تکدیاں رہ گئیاں
نشہ کیہڑا سی اوس شراب دے وچ
جنگاں واسطے پانی دے ہونئیاں نے
پانی سُکدا پیا چناب دے وچ
کسے کامل ولی دی کر محفل
کی لبھنا ایں خانہ خراب دے وچ
کیہڑے حیف حنیف دے وچ رُجّھوں
ایہو کجھ ہئی عشق دے باب دے وچ