جیہدی یاد توں جان لکائی ہوئی اے
اوہو یاد ہر ویلے ای آئی ہوئی اے
دکھ گھل دے سارے ول ساڈے
پنڈ دکھاں دی مہُرے ای چائی ہوئی اے
دکھ درد دا نہیں احساس کردے
یاری بے درداں نال لائی ہوئی اے
جان جندڑی روح تے دوس کوئی نہیں
ہر شے ای ایتھے پرائی ہوئی اے
تیری یاد وچ وقت جو گزر جاوے
اٹھے پہر دی ایہو کمائی ہوئی اے
چور چوہدری جگ نوں مت دیندے
عقل مند دی جگ ہنسائی ہوئی اے
موڑ پرت مہار ہن ول ساڈے
سنیا ہے بہار وی آئی ہوئی اے