پنڈاں اندر نہیں اے رونق رُکھاں اتے شریہاں دی
چاٹی لسی مکھن والی تے خوشبو نہیں گھیاں دی
صوفے میزاں بیڈ ڈبل پئے گھر گھر نظریں اوندے نیں
نہیں کوئی منجی سوتر والی بیری والی ھیاں دی
کیوں مہنگائی دا رونا روئیے کوسیے کیوں حکومت نوں
روٹی جے کر پکدی ہووے سوہنی پنج ست جیاں دی
پتراں باہجھوں جی نیں بجھدا نہیں کلیجہ ٹھردا اے
بھانویں فوج بنی پئی ہووئے بھانجیاں تے بھتریاں دی
جس جہیز دی خاطر پیو دا لک دوہرا ہو جاندا اے
اوہ جہیز پھر ہٹ کے ٓاوے قسمت ویکھو دھیاں دی
بچیاں دی تربیت اندر رخنہ کوئی نہ رکھیے جی
اوہ عمارت کدی نہ ڈگے جیہڑی ڈونگیاں نیہاں دی
فیصل ٓاباد زراعت اندر اگے ودھیا جاندا اے
ایتھے پئی ٓازمایش ھوندی نویاں نویاں بیاں دی
ھن تاں ٓاکے مل جا سجناں نہ ترسا اس جندڑی نوں
ویکھ بہار پھلاں دی آئی نالے چھم چھم میہاں دی
گھوگھی طوطا نظر نہ ٓاوے چڑیاں وی گھٹ گیاں نے
انڈے نہیں ٹٹیہر دیندی نہ اوہ کوک پپیہاں دی