مستی رنداں دی دون سوائی ہوئی اے
پھل کھڑن دی رت ہن آئی ہوئی اے
جیہڑی گل دا نہیں وجود ہے سی
اوسے گل توں ڈھیر لڑائی ہوئی اے
اوکھے وقت نہیں کوئی وی کم اوندا
کئی وار ایہہ گل آزمائی ہوئی اے
تیرے ہوکے رہے ہاں عمر ساری
ساتھوں دس کی بے وفائی ہوئی اے
اوہو قسمت ساڈی ہے نال ساڈے
روٹی جیہڑی چنگیر وچہ آئی ہوئی اے
حب پاک رسولؐ دے کلمے دی
جھگی شہر مدینے وچ پائی ہوئی اے
ہِن برکتاں درود و سلام دیاں
میلے دلاں دی سمجھ صفائی ہوئی اے
آپ سکھاں دے نال آرام کر دے
پنڈ دکھاں دی سانوں چوائی ہوئی اے