لگدا اے سکھ پریڑے ہو گئے
دکھ ہن چار چوفیرے ہو گئے
نہیں پرندے لہندے گھر وچ
اُچے ڈھیر بنیرے ہو گئے
بُھج کلیجہ زخمی ہویا
سیکھاں اتے بیرے ہو گئے
وچ درگاہ دے رتبے پاندے
عاجز ڈھیر نویرے ہو گئے
جتھے حسن بہاراں آئیاں
اوتھے عشق دے ڈیرے ہو گئے
جنھاں وفا نہ میں نال کیتی
سکے کیویں اوہ تیرے ہو گئے

غم دی رات ہجر دی لمی
اتوں گھپ ہنیرے ہو گئے
کیویں ختم غلامی منّاں
جدوں غلام پتھیرے ہو گئے
رُکھ تاں سارے کٹ دتے نیں
پکھواں کتھ بسیرے ہو گئے
سجناں رات غماں دی گھلی
قسمت نال سویرے ہو گئے
میں باغی ہاں اس مسکن دا
منصف جتھ وڈیرے ہو گئے
واہی ہجر دی برہوں فصلاں
اتوں غم دے کیرے ہو گئے
دکھاں دی پنڈ چاون والے
ساتھی کئی ہن میرے ہو گئے