جیہڑا حسن ازل مہتاباں وچ
اوہو چمکے نور آفتاباں وچ
جیہڑی ہووے بھل چک بھل جانا
اساں لکھیا خط شتاباں وچ
جہیڑا وڑیا عشق قبیلے نوں
اوہ آگیا سدا بے تاباں وچ
سانوں مان نہ مال و دولت دا
روٹی اوہو جیہڑی رکاباں وچ
جس کان پنجاب دا ناں بنیا
پانی لبھدا نہیں چناباں وچ
نہیں شوق عمل دی داد کوئی
علم رہ گیا صرف کتاباں وچ

توں یار میرے دی پچھنا ایں
جیویں سوہنا پھل گلاباں وچ
کدی عشق دے قیدی نہیں چھٹ دے
اینویں گزری عمر عذاباں وچ
اینویں دکھاں درداں ماریا اے
جگر جیوں کر سیخ کباباں وچ
کسے دکھی دل دی کر خدمت
رب لبھدا نہیں محراباں وچ
ہو عقل حیران کھلوندی اے
کیا لذت عشق دے باباں وچ
جیہڑے مال خزانے ونڈ دے سن
اوہ صفتاں کدوں نواباں وچ
جہدی خاطر جگ جہان بنیا
پڑھاں لکھ سلام جناباں وچ
کدی پچھ حنیف نوں جا کے تے
کی لبھیا عشق نصاباں وچ