انج تاں توں ڈکیندا نہیں ہائیں، ڈکیا ہنجواں ہاہواں نال
انج تاں توں ٹھلیہندا نہیں ہائیں، ٹھلیا ٹھنڈیاں ساہواں نال
بدل ماحول گیا اے سارا نویاں قدراں بدلن نال
گولاں اج وناں تے نہیں نے، نہیں نے بور اکاہواں نال
سر دا بھار اوڑک نوں اپنے پیراں اتے اونا ایں
اپنے بھار نے چونے پوندے ٹٹیاں ہویاں باہواں نال
ہک دوجے نال مل کے سارے لوک ترقی کر دے نیں
بندے نکل جاندے نیں اگے، اپنیاں اپنیاں ٹھاہواں نال
پٹھے وڈھ کے چھیڑ مجھیں دا اج رجونا پوندا اے
ڈھور کدے وی رج دے نہیں نیں، بنیوں پٹے گھاہواں نال
نازک جان ملوک تیری اے، اوکھا پیار دا پینڈا ای
ساڈی ریس ناں کر توں جھلیا، اسیں ہاں حال تباہواں نال
بھانویں اوگنہار ہاں میں، پاک نبیؐ دی امت ہاں
مینوں ساڑ دوزخ نہیں سکدا اگاں اتے بھاہواں نال