آخری ملاقات
وہ آنسوؤں کی رحل پر۔۔۔!
مقد س اشارہ ، روشن ستارہ، دھڑکنوں کا سپارہ رکھتے ہوئے!
آرزو کے چاک پر ۔۔۔کئی اصرار تخلیق کرتے ہوئے!
نصاب سخن، جواب سوسن، گلاب و نسترن۔۔۔!
ہاتھوں کے لمس میںسموتے ہوئے!
ساتویں آسمان سے۔۔۔پہلے آسمان تک چلی آئی تھی
صدیوں کے صحیفے سے لذت معانی۔۔۔!
رفاقت زمانی، فطرت ارغوانی جیسی آیتیں پڑھتے ہوئے!
دردائیل، رومائیلؑ اور جبرائیلؑ کی منتیں کرتے ہوئے!
آنسوؤں میں ڈوبی ہوئی۔۔۔!
نور ازل ، وعدہ اول کا واسطہ دیتے ہوئے!
اذیت میں روتے ہوئے۔۔۔درد میں تڑپتے ہوئے!
اسرا رمستجاب، معصوم شباب، سارے خواب لیے روک رہی تھی
مجھے شفق زادوں کے روبرو۔۔۔!
تازیانوں کی تحریر میں۔۔۔!
قلندرانہ زمانوں کی تفسیر میں۔۔۔تکمیل جنوں کا حکم مل چکا تھا
اسباب جدائی کے ساتھ۔۔۔!
خانہ بدوشی کا صحیفہ اور وظیفہ مل چکا تھا