اسرار خمار
ہوا کے ہاتھوں میں چھالے پڑے ہوئے تھے
خوشبو کے ہالے میں طاق تھا
پروانوں کے طواف سے!
چاندنی میں سرخ سبز آیتوں کے انکشاف سے!
جمال فسوں کے دلفریب در کھل رہے تھے
دل کی شرطوں میں دف بج رہی تھی
زمان عصر کے زاویوں میں!
اک ناقہ خمار میں ڈوبی چل رہی تھی
شبنمی چاندنی میں اسرار خواب ڈھل رہے تھے
خوشبو کی بدلتی تاثیر میں!
صوفیوں نے بھی باب وفا کے قریب بزم سجا رکھی تھی
آباد حویلیوں سے!
لذت معنی کے علمدار۔۔۔سبز موسم کے راز داں آ رہے تھے
شفیق مسافتوں کے۔۔۔زلفہ اور صودابہ کی۔۔۔!
دھڑکنوں کے راز کھل رہے تھے
قدیم خیالوں کا پتہ دیتے ہوئے!
کئی آہو سبز ساحلوں کی طرف نکل رہے تھے
ستاروں کی چال اور زائچے بدل رہے تھے۔۔۔۔