اسیر
آسماں پر چاند ستارے اور سورج بھی
چاندنی راتوں میں خوشبو کے مفسر کی!
ایلاف الست و ہست کی!
شام و سحر کی زنجیر سے بندھے۔۔۔موسموں کے ساتھ فسانے سناتے رہتے ہیں
آسمان سے پرے۔۔۔!
جن گلیوں میں سوسن و نسترن کی حکایتیں گونجتی ہیں
وہیں کہیں درِ طلسم پر کئی عنوان تڑپتے رہتے ہیں
جدائی کی لمبی روایتوں میں!
سبز شاخوں پر نازل ہوتے سرخ گلابوں کی حکایتوں میں!
جن کی آنکھوں سے خون بہہ رہا ہو۔۔۔!
جس کے ماتھے پر عین ، شین ،قاف لکھا ہو!
انہی قافلوں کے جناب قیس۔۔۔!
صحرا سے ساحلوں تک علمدار بن کے آتے ہیں
مسافتوں کے مارے۔۔۔شبنمی زمانے یہی داستاں سناتے ہیں
محبتوں کے اسیر۔۔۔چاہتوں کے سفیر کو بہت رولاتے ہیں

دشت غزالہ کے رازوں میں۔۔۔!
چاندنی راتوں میں پتھروں پر لہو نچوڑا جاتا ہے
تکمیل جنوں کے طاق میں روغن چشم سے چراغ روشن کیا جاتا ہے
عشق پرانا ہوتا نہیں۔۔۔دل کا صحیفہ رد ہوتا نہیں
سبز موسم میں نفرتوں کا وظیفہ ہوتا نہیں
عشق زادوں کی یہ داستان۔۔۔!
دشت و بیاباں سناتے رہتے ہیں
آرزو کا یہ باب۔۔۔!
مقدس کتاب سے پڑھ کر دیوانے سناتے رہتے ہیں
محبتوں کے اسیر۔۔۔چاہتوں کے سفیر کو بہت رولاتے رہتے ہیں