جدائی

جدائی کے نیزے پر دل تڑپتا ہے
پچھلے پہر کی ساعتوں میں!
خوشبو کے ساتھ۔۔۔ہوائیں بھیگی آنکھیں چومتی ہیں
روح البیان کی شرطوں میں۔۔۔!
خوابوں کے سوگ میں سوسن نسترن!
ثنویت کی آہٹوں میں غنا سطیت کی سانسیں سمو رہی ہیں
زرتشت، گوتم، عیسیٰؑ صدیوں پہلے۔۔۔!
دائم ’’فارقلیط‘‘ کا صحیفہ پڑھ کر سنا گئے
پھر بھی آبنائے محبت میں تیرتے بجروں کے بادباں پر۔۔۔!
اک پرندہ۔۔۔!
معصوم موسموں کے صحیفوں کی آہٹیں بولتا رہتا ہے
ہجر کے صحرا میں دل تڑپتے ہوئے!
روغن چشم سے چراغ روشن کرتے ہوئے!
معتبر علامتوں کو جدائی کی میزان پر تولتا رہتا ہے