وہ۔۔۔!
میں خانقاہ کا دروازہ کھولتا
وہ میرے پیچھے پیچھے مست چراغ کی الست روشنی میں!
باغ عدن میں لکھی۔۔۔!
نثری نظموں کی ظہر اور عصر کی کتاب سینے سے لگائے چلی آتی
ارضی زخموں کو
تاثیر مغرب اور آب عشاء سے دھوتی
اپنی گود میں۔۔۔میرا سر رکھتے ہوئے!
مر مری بانہوں میں لیے۔۔۔حواؑ کی طرح لپٹ جاتی
لوبان و صندل سلگاتے ہوئے!
آفاقی چاندنی میں زخموں پر ماہتابی مرہم لگاتی
تہجد شناس نظروں سے دیکھتی۔۔۔!
کنواری کرنوں جیسے ہونٹوں سے چومتے ہوئے!
اسمائے عشق کا سینے پر دم کرتی
پھر محبت پہ درود۔۔۔چاہت پہ سلام پڑھتے ہوئے
فجر کے حوالے کرتے ہوئے۔۔۔نہ جانے کیوں چلی جاتی ؟
بس لمس کی حدت۔۔۔!
بوسوں کی لذت چھوڑ جاتی ہے