دیباچہ
رب دے پاک ناں تو شروع کرنا ہاں جیہڑا بڑارحمان تے رحیم اے تو دست بستہ سلام آقائے دوجہاں سرکارِ دو عالم ﷺ دی بارگاہ وچ جنھاں دی خاص نظر عنائیت اے، اینھاں گنہ گاراں تے اللہ پاک دا ایہہ احسانِ عظیم اے کہ سانوں نسبت عطا کیتی۔ حضور نبی کریم ﷺ دے نال اہلیت دے نال اظہار، پنجتن پاک دے نال تے آپ دی آل پاکؓ دے نال تے آپ ﷺ دے غلاماں دے نال اللہ دے ولیاں دا وی شکرگزار ہاں انہاں دے بڑے اُچے ظرف تے بڑے کھلے دل نال عیباں بھریاں نوں گل نال لالیا۔ تے رب کولوں انھاں دی بخشش دی دعا کیتی۔ شکر تے فکر دے ایس پینڈے وچ ٹر دے ٹردے حضرت قبلہ خواجہ محمد عبدالرحمن تے ، جگ دے راجہ دے دروازے تے ہتھ بنھ کے حاضر ہو گئے تے انج حافظ محمد اقبال ہوری میرے پیربھائی بن گئے۔
حافظ محمد اقبال ہوری میرے توں بہت پہلاں خواجہ صاحب دے مرشد سائیں ہوراں دے دست بیعت ہوئے ہوئے نیں ۔ حافظ صاحب نال بڑیاں ملاقاتاں رہیاں پر اُنہاں دے ایس راز دا پتہ نئیں سی پئی ایہہ بڑے چنگے شاعر وی نیں۔ حافظ صاحب ہوراں جدوں اپنا شعری مسودہ میرے سامنے رکھیاتاں مینوں پتہ لگا پئی حافظ صاحب شاعر وی نیں۔ تے اُوہناں دی شاعری دے اندر عشق ، لگن تے سرکارِ دوعالم ﷺ دے نال عشق تے مرشد پاک دے نال عقیدت تے مرشد دی جدائی دے فراق دا رنگ بڑا گھڑواں اے ایہہ اشعار نسبت رکھن والے ہر بندے دے دل دی آواز نیں۔ ایہہ تے پڑھن والے تے اک خاص طراں دی رقت طاری کرچھڈدے نیں۔ ہر ہر شعر دے پچھے بیتے ہوئے ویلے دی اک مکمل کہانی موجود اے تے ہر کہانی دی نسبت مرشد دے نال سمبندھ رکھی دی اے۔ ہوکے ، ہنجو تے ہاواں ایہہ اشعار پڑھ کے ودھدے چلے جاندے نیں تے خواجہ صاحب دے دوارے دے سارے منظر اک اک کر کے اکھاں اگے گھمن لگ پیندے نیں۔ ایہو جہی حالت زار دے اندر میں اکثر خواجہ صاحب نوں یاد کردیاں ہوئیاں حضرت خواجہ غلام فریدؒ دے ایہہ اشعار پڑھناں ہاں۔
اُچیاں لمیاں لال کھجوراں تے پت جنھاں دے ساوے
جس دم نال پریت اساڈی ساکوں اوہ دم نظر نہ آوے
گلیاں سنجیاں اُداس ڈسیون اَتے ویہڑا کھاون آوے
یار فریدؔ اوتھے کیہہ وسناں جتھے یار نظر ناں آوے
حافظ محمد اقبال صاحب لئی میں دعاگو ہاں پئی اللہ پاک انھاںدے ذوق علم تے عمل تے عمروچ خیروبرکت پاوے، انھاں دے شوقِ آگہی وچ وادھا کرن تے دین ودنیادی بھلائی عطا کرن تے سارے پیربھائیاں نوں مرشد پاک حضرت قبلہ خواجہ محمد عبدالرحمن سائیں دے رسے ہوئے طریقیاں دے مطابق حیاتی گزارن تے شریعت تے بڑے پکیاں ہو کے عمل دی توفیق عطا فرمان۔ (آمین)
والسلام
مرشددے قدماں دی خاک
میاں مسعود الحسن گنج قادری
۴۹۔اے جناح کالونی بہاول نگر