نعت بحضور سرورکائنات ﷺ
(بر استدعا حاضری مدینہ پاک )
کمبل پوش مدینے والے دو جگ صدقے تیرے
نظر کرم دی پاء اک واری دکھ ٹل جاون میرے
ہر دم تانگ مدینے والی دل نوں کھچدی رہندی
پاک محبت آقا تیری لین آرام نہ دیندی
اپنے کول بلا لے سائیاں کر دے کرم گھنیرے
رو رو وچ فراق دے آقا نبھ گئی زندگی میری
جوں جوں دیر زیادہ ہووے ہووے مرض چنگیری
لکھ حکیم سرہانے بیٹھے کردے جتن بہتیرے
عشق تیرے نے میرے حبیبا لٹ دلے نوں پائی
چین آرام نہ ہرگز آئوندا، پاندا دل دہائی
ہُن تے شہر مدینے سائیاں ہون غریب دے ڈیرے
حاجی شوق زیارت لے کے ہون مَکّے دے راہی
ہکناں نوں گھر بیٹھیاں دلبر صورت آن وکھائی
واہ نصیب اُنہاں دا سائیاں جنہاں کیتے درشن تیرے
اقبال قادری بن کے عاجز رو رو عرض گذارے
مسکن شہر مدینہ ہووے دکھ مٹ جاون سارے