حضور بابا پیر سید ولی محمد شاہ سائیں رحمۃ اللہ علیہ
(آف پیر شاہ والے )
میری بدل دیویں تقدیر ولی شاہ باباؒ جی
توں ایں مولا علی دا وزیر ولی شاہ باباؒ جی
آلِ نبی، اولادِ علی ایں، پائی شان نرالی توں
جو وی آیا در تیرے تے گھلیا نہ کوئی خالی توں
کوہجھیاں نوں گل لا کے سائیاں لگیاں دی لج پالی توں
میری معاف کریں تقصیر ولی شاہ باباؒ جی
میری بدل دیویں تقدیر ولی شاہ باباؒ جی
اہل علاقہ گھر گھر سائیاں تیرے دیوے بلدے
شان انہاں دی پچھنی کی جیہڑے تیری سنگت رلدے
ناں تیرا ہک وار جے لیّے ساڈڑے دکھڑے ٹلدے
شعلہ پیر تیری تصویر ولی شاہ باباؒ جی
میری بدل دیویں تقدیر ولی شاہ باباؒ جی
ولیاں دا سرتاج سداویں تیرے شان نرالے نیں
تیرے منن والے سائیاں ہر جا رہن سوکھالے نیں
ایڈ سخاوت ہور نہ کوئی، بن منگیوں بھرے پیالے نیں
دیویں درشن کامل پیر ولی شاہ باباؒ جی
میری بدل دیویں تقدیر ولی شاہ باباؒ جی

سیاں نے دربار تیرے تے جھرمٹ ویکھو پایا
ہجر فراق تیرے وچ سیاں رو رو حال ونجایا
جنہاں سک مرشد دی رکھی اوہناں درشن پایا
دیویں صدقہ بدر منیر ولی شاہ باباؒ جی
میری بدل دیویں تقدیر ولی شاہ باباؒ جی
کیتھل پیر دا فیض روحانی شہر قبولے آیا اے
مئے نوشاں نوں دستگیرؒ سائیں بھر بھر جام پلایا اے
بابے پیر ولی شاہؒ تے تاں ہوکا پیا دیوایا اے
تیرے در دا بناں فقیر ولی شاہ باباؒ جی
میری بدل دیویں تقدیر ولی شاہ باباؒ جی
پیر مبشر پوتا سائیں دا بڑیاں شاناں والا
مہر محبت ایڈی اس وچ ہر دا پچھے حالا
صورت سیرت دادے والی سب نوں دیوے سنبھالا
ہویا قادریؔ زلف اسیر ولی شاہ باباؒ جی
میری بدل دیویں تقدیر ولی شاہ باباؒ جی