حضرت خان بابا ؒدی نذر

تیرے در تے میں بابا آئی کدوں دی کھڑی
پاویں جھات کرم دی آوے دید دی گھڑی
تیرے در توں سوالی کدے جان نہ خالی
میں پکڑ کے جالی بابا کدوں دی کھڑی

توں ایں خواجہ اجمیری دا بوہت پیارا
تونسے والیاں دی اکھیاں دا توں ایں ستارا
میری شوہ وچ کشتی ، نہیوں دسدا کنارا
قبلہ عالم دے پیارے جاوے غم دی گھڑی
تیرے در تے میں بابا آئی کدوں دی کھڑی

ہور کج وی نہ منگاں ، بخشو اپنی غلامی
ایس در تے ای گزرے میری عمر تمامی
تیرے جھاڑو میں دیساں ایہو بھردی میں حامی
تیرا تک کے دوارہ ، در تیرے آ وڑی
تیرے در تے میں بابا آئی کدوں دی کھڑی

جنھاں یادِ خدا وچ ، ساری زندگی گزاری
ناں اونہاں دا لیاں ٹلدے دکھ تے بیماری
سیاں کرن سلاماں ایتھے پیاں وارو واری
جمعرات نوں لگے ایتھے رونق بڑی
تیرے در تے میں بابا آئی کدوں دی کھڑی

تساں قادری سائیںؔ تے وی کرم کمایا
بخش اوہنوں امامت، اوہدا شان ودھایا
خاص کیتی عنایت ، درشن چا کرایا
وسے قادریؔ اُتے انجے رحم دی جھڑی
تیرے در تے میں بابا آئی کدوں دی کھڑی