پیر عبدالقادر ؒ
)دین پور شریف والے(
پیر اساڈے عبدالقادر جیہڑے دین پور والے
دین نبیؐ دی خاطر جنھاں لکھاں دکھڑے جالے
شاہ عبدالرحیم تے عبدالقادر نے سب کرم کمایا
خواجہ اللہ بخش نے یارو فیض انہاں توں پایا
جٹو والے ٹبے اُتے تنبو دین دا لایا
دین دے اس چشمے توں لوکی بھر بھر پین پیالے
خواجہ اللہ بخش بہاولنگر چ قدم ٹکایا
دین دی روشنائی نوں ایتھے آپ نے سی پھیلایا
جٹو والہ بنیا مرکز، دین پور نام رکھایا
جگ وچ دھماں پیاں ہر کوئی دین پور نوں بھالے
حضرت دے رہے بیٹے دونویں درس قرآن پڑھاندے
شرع و حدیث تے فقہ فقر دے دیوے رہے جلاندے
لنگر پانی ہر اک نوں اوہ گھروں رہے کھواندے
شہر محلے کوچے گلیاں چرچے ہون دوبالے

حضرت یحییٰ پوتے سن جو ، بہتی شہرت پائی
جس تے نظر کرم دی کردے دل دی کرن صفائی
ذکر اذکار تے عشق نبی ؐ وچ فقر دی جوت جگائی
ایویں فیض روحانی ملدا جوں مینھ وچ ویہن پرنالے
شکل شبہات سی آپ دی ایسی من چ اتردی جاوے
ویکھے جیہڑا ول ول ویکھے فر وی صبر نہ آوے
چولا آس، رومال دا گھونگھٹ ، حضرت نوں بھاوے
دلوں بجانوں منیا جہناں بن گئے دین دے رکھوالے
حضرت جی دے بیٹے سارے پیار بھرے نے بھائی
ایہناں وچوں پیر عبدالقادر بہتی شہرت پائی
کرے دعا تے ہووے شفاء رب سوہنے گل بنائی
جہڑے در تے آون رب دکھ انہاندے ٹالے
قادری سائیںؔ در انہاں دے بہہ کے فیض کمائیے
جئے کر صدق یقین تھیں بہئے کدی وی تھوڑ نہ پائیے
رب کرے در اوہناں دے اسیں سارے آئیے جائیے
جہیڑا اوہناں دے در آوے ہور کوئی نہ بھالے