حضرت سید افتخار الحسن شاہ زواری
جیہڑا آپ دے در تے آیا دکھ رہیا ناں بیماری
کھوبر پُل تے لمبی بھینی دین دا جھنڈا لایا
ایڈا فیض روحانی ونڈیا ہر اک نوں ورتایا
اوگن ہار غریباں اتے بہتا کرم کمایا
دل دا میل اتارن پل وچ بھاویں جنی وی اوگنہاری
ویکھن نوں اوہ بہتے سادے پر دل وچ دیوے بلدے
کرن نظارے رب دے پیارے جہڑے سنگت رلدے
بہتا شوق زیارت رکھدے راہواں آپ دیاں ملدے
اوگن ہار غریباںدی حالت آپ نے بہت سنواری
ملتان شہر توں فیض روحانی لمبی بھینی آیا
مخدوم و المشائخ زوار سائیں نے بہتا ہی کرم کمایا
موتی پئے بکھیرن سائیں جتھے وی قدم مبارک پایا
راہواں آپ دیاں تک تک سئیاں کردیاں رہن انتظاری
مخدوم والمشائخ زوار سائیں بیان جدوں فرماندے
انسان کیا پرندے وی ایتھے آکے ہن رک جاندے
سئیاں راہواں تک دیاں رہندیاں کدوں سرکار آندے
مکھ مخدوم دا تکن لئی خلقت راہواں تک تک ہاری

محفل پاک نظامی دے وچ جدوں جلوا افروز نیں ہوندے
محفل دے پروانے سارے عشق نبی وچ روندے
نیر وہاون تے کرلاون پئے ہنجواں ہار پروندے
قلبی عشق روحانی والی لگے دل تے ضرب وی کاری
بیم و رجا تے نظر جے پائیے ولیاں دے سَر کردے
سلطان سکندر مست قلندر آن سلامی بھردے
اوگن ہار غریباں اُتے کنیاں وانگوں ورہدے
جس تے نظر کرم دی پاندے کردے قلب وی جاری
عشق نبی دی شمع جلائی گھر گھر روشن ہویا
لبھی جس حقیقی حیرت اوناں رات نوں سویا
بن حیرت ایہہ زندگی گزری کر افسوس اوہ رویا
حیرت باہجوں زندگی ساری بن گئی ذلت خواری
سید شیر علی شاہ نے لمبی بھینی قدم مبارک پایا
علم خزانہ ظاہر مخفی ہر اک نوں ورتایا
گھر گھر چرچا دین نبی دا کوئی نہ ریہا ترہایا
عشق نبی دا تازہ رکھنا پتراں نوں آکھیا جاندی واری

مخدوم و المشائخ زوار سائیں توں فیض روحانی پائے
ایڈا ادب تے خدمت کیتی بن مخدوم سی آئے
توں وی خدمت کرلے سجناں وقت گزر دیا جائے
گزریا ویلا فیر نیں اوناں توں رونویں گا کر کر زاری
سید شیر علی شاہ نے لمبی بھینی کھولیا عشق دا میخانہ
گھر گھر عشق دا دیوا بالیا ہر کوئی آپ دا دیوانہ
ایڈی شہرت چرچہ ہویا کاسہ ہر اک دا بھر جانا
لنگر وچ شفاء انہاندے ہسدی جاوے دکھاندی ماری
بابا جی دے دونوں بیٹے پیار بھرے نیں بھائی
پیر سید افتخار شاہ نے جگ وچ بہتی شہرت پائی
سید سجاد شاہ دے وی در تے خلقت دوروں دوروں آئی
آل نبی اولاد علی سوہنے رب دتی سرداری
قادری سائیںؔ ایہہ پیر نیں بڑیاں شاناں والے
انہاندے منن والے سداہی رہن سوکھا لے
دین نبی دے ایہناں ہر جا دیوے بالے
کردے رہن ہمیشہ اے دین دی خدمت گاری