حضرت مولانا قاری نیاز احمد مرحوم

قاری نیاز احمد سرکار
حقیقت دے وچ سن اوہ رب دے یار
سوہنا خلق تے سوہنی صورت ہر اک نوں پئی بھاوے
جیہڑا ملدا ہک واری او ول ول ملنے آوے
کرن دعا رب دیوے شفاء سوہنا سائیں کرم فرماوے
غم اندوہ سب دور ہوجاندے جیہڑا ملدا سی ہک وار

بہاول نگر توں ٹامیوالی مرشد نے بھجوایا
ساوی مسجد ڈیرا لاء کے دین اسلام پھیلایا
قرآن شریف تے فقہ فقر دا نالے درس حدیث پڑھایا
وعظ کلام انہاں دا سن کے توبہ کردے اوگن ہار

ایڈا چرچا شہرت ہوئی ہر کوئی آپ نوں بھالے
دین اسلام دے آپ حضور نے ہر جا دیوے بالے
کفر و شرک مٹایا آپ نے ہر جا تھئے اجالے
دینی جذبہ ویکھ کے لوگ ہو گئے تابعدار

سادے کپڑے سادہ کھانا خوش اخلاق بتہرے
جس تے نظر کرم دی پاندے کردے دور اندھیرے
واہ نصیب انہاں دا جینہاں کیتے درشن تیرے
یاد تہاڈی بڑا ستاندی دل روندا زار و نزار

ظاہر باطن پاک انہاں دا رزق حلال کماندے
آل اولاد تے آن والا نوں رزق حلال کھواندے
ہر اک نوں تاکید سی کردے جو در سرکار تے آندے
نہ اوہ محفل نہ اوہ رونق کتھے ٹر گئے ہو سرکار

قادری سائیںؔ یاد انہاں دی دل وچ ورمی بہہ گئی
ایڈا درد وچھوڑے والا کیویں ایہہ جندڑی سہہ گئی
رب راضی تے ہر کوئی راضی جگ وچ گل انہاں دی رہ گئی
پر وچھڑے یار نہ بھلدے بھاویں گزرن سال ہزار