1689954541792_56117122
Not Available Free
75
چرخہ
کت چرخہ داج بنا کڑیے
خوشیاں نال سوہرے جا کڑیے
تیرے چرخے دی گھوگ پیاری نی
توں کت کت چرخہ ہاری نی
دکھ ہٹسن ، دور بیماری نی
کر رب دی حمد ، ثناء کڑیے
کت چرخہ داج بنا کڑیے
تیرے چرخے دی ماہل پرانی نی
اُٹھ راتیں رڑک مدھانی نی
فر مکھن آیا جانی نی
توں رب دا ذکر اُلاء کڑیے
کت چرخہ داج بنا کڑیے
تیرا چرخہ بہت پیارا نی
ایہہ دنیا کوڑ پسارا نی
کیہ کلّی ، کیہ چوبارا نی
گئے رب دی من رضا کڑیے
کت چرخہ داج بنا کڑیے
توں چرخہ منگ لیائی نی
توں چرخے تند نہ پائی نی
کیوں کیتی بے پروائی نی
نہ ویہلیاں وقت گنوا کڑیے
کت چرخہ داج بنا کڑیے
تیرے چرخے دی ہتھی بھوندی نی
تینوں نیندر بڑا ستوندی نی
راتیں اُٹھ نہ چھلیاں پوندی نی
کیہ دسیں گی اُوتھے جا کڑیے
کت چرخہ داج بنا کڑیے
تیرے چرخے دی ہتھی بھاری نی
تینوں حُسن دی چڑھی خماری نی
تیری مت گئی کیوں ماری نی
اُٹھ غافل! رب دھیا کڑیے
کت چرخہ داج بنا کڑیے
تیرے چرخے دے مُنے لمبے نی
تینوں ہر دم پین اچنبھے نی
دل تیرا تھر تھر کمبے نی
جد لیا کہاراں چا کڑیے
کت چرخہ داج بنا کڑیے
تینوں چرخہ کس پھڑایا نی
دس توں کی داج بنایا نی
ویہلے بہہ بہہ وقت گنوایا نی
سس پچھسی جھڑکاں پا کڑیے
کت چرخہ داج بنا کڑئیے
تیرا چرخہ رنگ رنگیلا نی
کر اگانہہ دا کوئی حیلہ نی
تیرا مرشد پاک وسیلہ نی
دینا سائیں پار لنگھا کڑیے
کت چرخہ داج بنا کڑیے
ID | Chapters/Headings | Author(s) | Pages | Info |
ID | Chapters/Headings | Author(s) | Pages | Info |