کوڑا جوبن
نخرے نال جاندیئے مٹیارے جوبن کوڑا تیرا
ایہہ چار دناں دی چاندنی فیر ہونا سدا ہنیرا

تیتھے چڑھیا حسن جوانی نی
مغروری چھڈ ، سب فانی نی
توں چھیتی رڑک مدھانی نی
نہیں رات دا فیر سویرا نی
ایہہ جوبن کوڑا تیرا نی

تینوں حسن دی چڑھی خماری نی
تیری کیوں اڑیے مت ماری نی
ایتھے پھردے پئے وپاری نی
انہاں لَے جانا، بنھ سہرا نی
ایہہ جوبن کوڑا تیرا نی

تیرے حسن دا مچیا شور کڑے
تیرے اندر تیرا چور کڑے
ایہہ ہویا اے منہ زور کڑے
ایہہ بھرم نہ رکھسی تیرا نی
ایہہ جوبن کوڑا تیرا نی

ایس حسن توں ہو بیزار کڑے
ایس کرنا تینوں خوار کڑے
توں لگسیں کسراں پار کڑے
ایتھے کسے نہ پانا پھیرا نی
ایہہ جوبن کوڑا تیرا نی

کیہ کرنا حسن تے مان کڑے
ہک دن چھڈنا ایہہ جہان کڑے
رکھیں اللہ ول دھیان کڑے
جہدا ہر دم فضل گھنیرا نی
ایہہ جوبن کوڑا تیرا نی