اگلا امتحان
رَکھ پڑھنے ول دِھیان کُڑے
تیرا بورڈ دا ہے امتحان کُڑے

تیرے نال دیاں ٹر گیاں نیں
تینوں واجاں مارن پیاں نیں
تو بڑیاں نیندراں لیاں نیں
اُٹھ جاگ، ہوسیں پریشان کُڑے
رَکھ پڑھنے ول دِھیان کُڑے

راتیں جاگ جو سبق پکاندیاں نیں
اُٹھ فجریں مڑ دہراندیاں نیں
اوہو چنگے نمبر پاندیاں نیں
جو پڑھدیاں نیں ہر آن کُڑے
رَکھ پڑھنے ول دِھیان کُڑے

تیری میڈم بڑی ہی پیاری اے
جس حالت آن سنواری اے
پھل کلیاں باغ بہاری اے
سب ویکھ ہوون حیران کُڑے
رَکھ پڑھنے ول دِھیان کُڑے

چک بستہ سکولے جاویں توں
ہر اک دے دل نوں بھاویں توں
پڑھ لکھ کے خوشیاں پاویں توں
ہووے راضی رب رحمان کڑے
رَکھ پڑھنے ول دِھیان کُڑے

قادریؔ دی نہ پند بھلاویں
پڑھن پڑھان چ وقت نبھاویں
محنت کر کے نمبر پاویں
ہوے چرچا وچ جہان کُڑے
رَکھ پڑھنے ول دِھیان کُڑے