کامیابی
کر نال ملاّح دے پیار کُڑے
جے توں لنگھنا چاہویں پار کُڑے
دن چڑھیا تے شام ہو جانی اے
ڈھل جانی اے یار جوانی اے
تیری ڈولی جنگل جانی اے
جتھے دُکھ ہزار کُڑے
کر نال ملاّح دے پیار کُڑے
اوہ پینڈا دور دراز دا اے
اوتھے پہلا پچھ نماز دا اے
اوہ جانوں راز نیاز دا اے
کر عمل تے کھٹ بہار کُڑے
کر نال ملاّح دے پیار کُڑے
تدھ چوڑا چھن چھن چھنکے نی
گل پا حضوری منکے نی
رنگ دار تے ونکو ونکے نی
توں ہس کے وقت گزار کُڑے
کر نال ملاّح دے پیار کُڑے

تیرے وال سنہری بھاندے نیں
جو ویکھن خوشیاں پاندے نیں
ایہہ ہسن چار دناں دے نیں
نہیں لگنا فیر بزار کڑے
کر نال ملاّح دے پیار کُڑے

تینوں سائیں سنہڑے گھلے نی
توں خرچہ بنھ لے پلے نی
جاندی نوں کہڑا ٹھلے نی
توں کیتا سی اقرار کُڑے
کر نال ملاّح دے پیار کُڑے

قادریؔ دی گل پلے پاویں
اکھیں کسے دے نال نہ لاویں
سچے در تے سیس نواویں
تینوں ملسی چین قرار کُڑے
کر نال ملاّح دے پیار کُڑے