ذکرِ الٰہی
اللہ اللہ کریا کر، بس اللہ اللہ کریا کر
خالی کوٹھی دل والی اے ذکر دے نال توں بھریا کر

فجری اُٹھ مسیتے جاویں
رُٹھے رب نوں رج مناویں
کدی کسے دا دل ناں ڈھاویں
جو وی تیرے سر تے آوے نال صبر دے جریا کر
اللہ اللہ کریا کر، بس اللہ اللہ کریا کر

مسجد دی جو کرے صفائی
رحمت رب دی اس نے پائی
قبر عذابوں ملے رہائی
رحمت دے دریا دے وچوں من دی ڈولی بھریا کر
اللہ اللہ کریا کر، بس اللہ اللہ کریا کر

وچ مسیتاں چانن کردا
مالک جہڑا مال تے زر دا
رہیں خدا تھیں ہر دم ڈردا
توبہ دے دریا دے اندر ہر ویلے توں تریا کر
اللہ اللہ کریا کر، بس اللہ اللہ کریا کر

جہڑا درس مسیت بناوے
اللہ اُس دا رزق ودھاوے
ایتھے اوتھے تھوڑ نہ پاوے
ساون بدل وانگوں سجناں وچ مسیت دے ورھیا کر
اللہ اللہ کریا کر، بس اللہ اللہ کریا کر

قادریؔ کر توں ذکر الٰہی
اس وچ ذرا نہ کریں کوتاہی
ہوویں پاک عرب دا راہی
اوکڑاں جتنیاں مرضی آون، اُچا جگرا کریا کر
اللہ اللہ کریا کر، بس اللہ اللہ کریا کر