اگلا جہان
ماپیاں دے گھر سدا نہیں رہنا ہک دن توں ٹر جانا
دم دم رب رب ورد پکا توں ایہہ تیرے کم آنا

ماں تیرا پئی داج بناندی
محنت کر کے پئی پڑھاندی
ہر دم صدقے واری جاندی
اک دن اوسے ماں نے تینوں ڈولی دے وچ پانا
دم دم رب رب ورد پکا توں ایہہ تیرے کم آنا

جوبن وچ مغرور کڑے
کیوں پھرنی ایں لا سندور کڑے
کی کرسیں پیش حضور کڑے
کلم کلیاں اگے جانا اوتھے جا کے توں پچھتانا
دم دم رب رب ورد پکا توں ایہہ تیرے کم آنا

مکھ تیرے تے آئی بہار
جد ویکھن ، رُکدے اسوار
جھلدے نہ اکھیاں دے وار
جوبن ڈھلیا تے تیرے ول کسے نہ مکھ پرتانا
دم دم رب رب ورد پکا توں ایہہ تیرے کم آنا

بلبل کردی موج بہاراں
وچھڑی کونج تے گئیاں ڈاراں
کیہڑا سنگی حشر بزاراں
ویکھ جنازہ ہک دن تیرا بھائیاں چک لے جانا
دم دم رب رب ورد پکا توں ایہہ تیرے کم آنا

ایہہ دنیا بہت سہانی اے
ایتھے چلنی نہیں من مانی اے
دن قادریؔ چار جوانی اے
ہک دن ایسا قادری آسی توں وی صاحب دے ول جانا
دم دم رب رب ورد پکا توں ایہہ تیرے کم آنا