دنیا دی حقیقت
حسن جوانی دا اے روپ نہیوں رہنا
ہک دن آسی، توں ہے دکھاں وچ پینا

کرسی وفا تیرے نال نہ جوانی
ٹر جاوے ہک واری پھر ناں ایہہ آنی
ایہہ تیری مغروری ساری ٹٹ جانی
پانی والی لہر وانگوں زندگی نے وہنا
حسن جوانی دا اے روپ نہیوں رہنا

ماں تیری ہر گل کردی ہے پوری
ہتھاں نال ٹورے تینوں اوہدی مجبوری
ہک دن چھڈنا جہان اے ضروری
نیکیاں دا پا لَے توں گل وچ گہنا
حسن جوانی دا اے روپ نہیوں رہنا

نخرے نیں چار دن فیر پچھتانا
حسن گیا تے گیا سب یارانا
عشق حقیقی نے ای ساتھ نبھانا
قادریؔ سائیں دا توں من لَے کہنا
حسن جوانی دا اے روپ نہیوں رہنا

چڑھدی جوانی بڑا شور ہے مچایا
چوڑیاں تے جھانجھراں نے دل بہلایا
حسن دے پچاریاں نوں بڑا توں ستایا
روپ والے بت تیرے ہک دن ڈھہنا
حسن جوانی دا اے روپ نہیوں رہنا

قادریؔ ایہہ محفلاں نہ ایہہ ویلے آنے
نویں ایتھے آ گئے ، پرانے ٹر جانے
اگے والی سوچ، گل کہندے نیں سیانے
سدا نہیوں جوبنے تے ایہہ رنگ رہنا
حسن جوانی دا اے روپ نہیوں رہنا