اگے دی سوچ
سانوں دسیا پیر بخاری اے
ایہہ زندگی ملی ادھاری اے

جو قدر وقت دی کردے نیں
دل بھانڈا ذکر تھیں بھردے نیں
اوہ دوہیں جہانیں تردے نیں
جنھاں ذکر دی چڑھی خماری اے

ایہہ عمر نہ مفت گنواویں توں
نہ بوہے غیر دے جاویں توں
سوہنے رب نوں رج مناویں توں
سچی رب رحیم دی یاری اے

ایہہ جیون کھیڈ تے ہاسا نہیں
ایتھے سدا کسے دا واسا نہیں
کسے قبر چ پرتنا پاسا نہیں
اوتھے ہونی بڑی دشواری اے

ہین زندہ دل، سب کہندے نیں
جو سب دے دکھڑے سہندے نیں
تے سادہ سادہ رہندے نیں
ایہناں دی ہی مختاری اے

زنگ اپنی جان نہ لاویں توں
کر عمل حیاتی پاویں توں
سوہنے رب نوں رج مناویں توں
اس باہجھوں ساری خواری اے

ایہہ جیون کرم ربانا اے
توں ہک دن ایتھوں جانا اے
تیرا اصلی گور ٹھکانا اے
بس توبہ نال بُہاری اے