محبوب دی یاد
ساری رات میں رکھیاں تاہنگاں
دھمی ککڑاں دتیاں بانگاں
ملاں اُٹھ مسیت نوں جاوے
اللہ دا سد پیا سناوے
نیکاں دے ایہہ من نوں بھاوے
بُریاں وجن پیّاں سانگاں
ساری رات میں رکھیاں تاہنگاں
ساری دنیا سکھ نال سوندی
مینوں ستیاں نیند نہ اوندی
یاد سجن دی پئی تڑپوندی
کندھ عشق دی کیویں لانگاں
ساری رات میں رکھیاں تاہنگاں
دسو ہا کوئی عشق دا دارو
دکھاں دا کوئی بن جائو بھارو
جنگل ڈھونڈیا تے تھل مارو
دل وچ وجدیاں نیں اَج کانگاں
ساری رات میں رکھیاں تاہنگاں

واٹ ’’روم‘‘(۱) دی سئے کوہاں دی
میری کوئی پیش نہ جاندی
خبر ملے جے ول وطناں دی
جاواں گی فیر مار چھلانگاں
ساری رات میں رکھیاں تاہنگاں
جہلم شہر دی سوہنیاں جائیں
جتھے رہندا دلبر سائیں
مولا سانوں جلد ملائیں
ایہو نت دعائیں مانگاں
ساری رات میں رکھیاں تاہنگاں
قادریؔ سائیں سنجے ویہڑے
رانجھن باہجھوں دسدے کھیڑے
یار ملے مک جاون جھیڑے
نالے مکن ہکلاں چانگاں
ساری رات میں رکھیاں تاہنگاں
(۱)۔ مرشد پاک کا قیام کچھ عرصہ اٹلی(روم) میں بھی رہا ہے۔