1689954541792_56117145
Not Available Free
131
تاہنگاں
دن سارا تاہنگاں وچ لنگھدا اے یار وے
موڑ لَے مہاراں ، آ کے مل دلدار وے
دیوے نہ دلاسا کوئی کردے بکھیڑے نیں
ہس کے تے لنگھ جاندے دردی وی جیہڑے نیں
دسدا نہ کوئی رانجھا ایتھے سارے کھیڑے نیں
سجناں دے باہجھوں کوئی لیندا نہیوں سار وے
دن سارا تاہنگاں وچ لنگدا اے یار وے
دکھاں دی ہنیری میرے سر چڑھ آئی اے
ہویا اے ہنیرا چیز دِسدی نہ کائی اے
یاداں دا چراغ بال رات میں لنگھائی اے
سوہنیا توں آویں گا تے آوے گی بہار وے
دن سارا تاہنگاں وچ لنگدا اے یار وے
کیتا اقرار سی میں توڑ نبھاواں گی
اوکھے سوکھے ویلے وی میں ناں گھبراواں گی
سرکار دیاں چرناں چ موج مناواں گی
بھاویں گھیر لین مینوں دکھڑے ہزار وے
دن سارا تاہنگاں وچ لنگدا اے یار وے
اک دن ماہی ساڈے شہر وچ آوے گا
لکھاں بے نصیباں دے اوہ بھاگ وی جگاوے گا
جنھاں اُتے رب سوہنا کرم کماوے گا
اوہو اَج رج رج کرن گے دیدار وے
دن سارا تاہنگاں وچ لنگدا اے یار وے
قادریؔ نوں ایتھے نہیوں تھوڑ کسے گل دی
سجناں دے ولوں ٹھنڈی وا رہوے چلدی
ہجر دی اگ رہوے سینے وچ بلدی
عشق نال گرم رہوے دل دا بازار وے
دن سارا تاہنگاں وچ لنگدا اے یار وے
ID | Chapters/Headings | Author(s) | Pages | Info |
ID | Chapters/Headings | Author(s) | Pages | Info |