درشن

مائے نی جہلم جاون دے
پیا نوں دکھ سناون دے

پیا بناں میں ریہہ نہ سکدی
ہر دم اوہدیاں راہواں تکدی
تک تک راہواں کدی ناں اکدی
دل دا شوق نبھاون دے
مائے نی جہلم جاون دے

مدتاں ہوئیاں ملن نہ ہویا
دل رہندا اے کھویا کھویا
اکھیاں ہنجواں ہار پرویا
اے مالا گل وچ پاون دے
مائے نی جہلم جاون دے

پہاڑ ٹلے دا نظریں آوے
جے کر سوہنا تلک لگاوے
گجھڑا روگ اندر دا جاوے
دارو عشق دا کھاون دے
مائے نی جہلم جاون دے

دلبر نے جدوں مکھ دکھلایا
سب کچھ بھلیا، ہوش گنوایا
مئے نوشی وچ سب کجھ پایا
دل دی پیاس بجھاون دے
مائے نی جہلم جاون دے

جہلم شہر دے کریں نظارے
جتھے رہندے دلبر پیارے
قادری اوتھے چین قرار اے
اج رج کے درشن پاون دے
مائے نی جہلم جاون دے