سِک ماہی دی
جہلم دے دریا دا ٹھنڈا ٹھنڈا پانی اے
لَے اللہ دا ناں جے کشتی پار لنگھانی اے
دلبر ساتھوں دور ہے وسدا
ناز ، ادا تھیں دلڑی کھسدا
رستہ رب رسولؐ دا دسدا
آجا در تے چھیتی جے قسمت ازمانی اے
لَے اللہ دا ناں جے کشتی پار لنگھانی اے
دلبر دی میں دید دی پیاسی
دلبر باہجھوں رہے اداسی
کدوں اوہ سوہنا مکھ وکھاسی
ہک دن ماہی اِن شاء اللہ دید کرانی اے
لَے اللہ دا ناں جے کشتی پار لنگھانی اے
دلبر یار دا شہر سنگوئی
جس دی جگ وچ ریس ناں کوئی
پیر اصغر دی دیو دھروئی
جس نے اُس دا ورد پکایا اوہو مرد گیانی اے
لَے اللہ دا ناں جے کشتی پار لنگھانی اے

جہلم شہر ہے بڑا رنگیلا
اوگنہاراں دا اے وسیلہ
اوتھے جان دا کر کجھ حیلہ
عیباں والڑیاں دی تے ہو بخشش جانی اے
لَے اللہ دا ناں جے کشتی پار لنگھانی اے
ٹلے جوگی ریت بنائی
رانجھا آیا تلک لگائی
چنڑی رنگدیاں دیر نہ لائی
سجناں ریت قلندری ایہا بہت پرانی اے
لَے اللہ دا ناں جے کشتی پار لنگھانی اے
’’ڈھوک رجو‘‘ ہے پنڈ نرالا
جتھے وسدا اللہ والا
میلے دلاں نوں کرے اُجالا
کامل اکمل سوہنا مرشد جس دا فیض روحانی اے
لَے اللہ دا ناں جے کشتی پار لنگھانی اے