ملن دی چاہ
بس نوں ٹور ڈریورا میں ملنا ہے دلدار
جہلم جا روک لویں میں تکنا سوہنا یار

سوہنے دلبر دا کِتھ واسا
ڈھونڈ تھکی میں ہر اک پاسا
لبھدی پھراں میں پھڑ کے کاسا
میں اپڑی جہلم بازار

جہلم دے بزار نیں سوہندے
ویکھن والیاں دے دل موہندے
نین تے ہنجواں ہار پروندے
سوہنا ملسی کیہڑے وار

میں ٹلے تے آن کھلوواں
سد ماراں تے نالے روواں
کر کر توبہ اگلے دھوواں
رب چا بخشے اوگنہار

جہلم پل توں ٹلا دِسے
جتھے سجناں تے دل وِسے
قادریؔ عشق دے لمے قصے
کہنوں دساں وار و وار

ٹلا جوگیاں من نوں بھاوے
ویکھ کے میرا دل ٹھر جاوے
نت مراداں ایہہ دل پاوے
ایتھے لبھدا چین قرار