پریت

تیرے انتظار وچ کلی نوں سجایا میں
تیرے باہجھوں سوہنیا قرار وی ناں پایا میں

پھلاں نال سجدی اے باگاں دی بہار اے
پہلی واری تکیا تے ہو گیا سی پیار اے
سہنا پیا ہن مینوں دکھڑا ہزار اے
دکھاں والا بھار بھارا خوشیاں تھیں چایا میں
تیرے باہجھوں سوہنیا قرار وی ناں پایا میں

دن راتیں ہر ویلے تیرا ہی خیال وے
گلی گلی کوچے کوچے رہی تینوں بھال وے
ڈھونڈ ڈھونڈ تھکی میرا ہویا برا حال وے
دل میرا من دا نہیں بڑا سمجھایا میں
تیرے باہجھوں سوہنیا قرار وی ناں پایا میں

کلی وچ بہہ کے تیرا کراں انتظار وے
عشق تیرے نے ماہی دتا مینوں مار وے
چھیتی آ جا ہن ماہی لَے میری سار وے
تیرے باہجھوں دکھڑا ناں کسے نوں سنایا میں

کلی وچ بہنا تینوں عرشاں دی سیر وے
اک دن سوہنیا توں پا نہ آ کے پیر وے
ہر دم منگنی ہاں پیا تیری خیر وے
تیرے لئی ویکھ کِناں دکھڑا اٹھایا میں
تیرے باہجھوں سوہنیا قرار وی ناں پایا میں

قادریؔ کلی وچ بیٹھی مر جاواں گی
لگیاں وی سوہنیا میں توڑ نبھاواں گی
تیریاں وی یاداں دے چراغ میں جلاواں گی
پیا دی پریت نوں اے شوق تھیں نبھایا میں
تیرے باہجھوں سوہنیا قرار وی ناں پایا میں