ساون
ساون ماہ دا بدل آیا دل ہویا مسرور
سجن بھاویں جتھے ہووے ملنا بہت ضرور

دلبر سوہنا ملن نہ آوندا
دل کملا اے بڑا ستوندا
کدی تاں سوہنیا کرم کموندا
دل ملنے لئی ہے مجبور

ساری دنیا موج پئی کردی
مینوں تانگ لگی دلبر دی
میں سجناں دا پانی بھردی
پھراں میں جہلم تے پسرور

جے دل حجرہ صاف ہو جاوے
دلبر سوہنا پھیرا پاوے
گھر بیٹھیاں نوں مکھ وکھاوے
ویکھ کے نین ہوون مخمور

جدوں میں من وچ جھاتی پائی
صورت دلبر نظر سی آئی
دل دی ساری پیاس بجھائی
میرے غم ہوئے سب دور

دلبر نوں میں جان نہ دیساں
منتاں کرساں رات رہیساں
زخم دلے دے کھول وکھیساں
مینوں چھڈ نہ جان حضور

قادریؔ کدی نہ یاری چھوڑیں
کسے بندے دا دل نہ توڑیں
ہر دم یار دی مرضی لوڑیں
بھاویں ہوویں چکنا چور