ہسپتال دی نرس
لوکی تینوں سسٹر کہندے، کریں علاج بیماراں
سُن کے دکھ مریضاں دیویں خوشیاں لکھ ہزاراں
چٹی وردی سوہنی تیری پئی دلاں نوں بھاوے
ویکھن والا ول ول ویکھے ایڈا شوق ودھاوے
ایہہ وی تیرا شوق ہے رکھدی لگیاں توڑ نبھاوے
نال تیرے ایہہ جاسی جس دم جاسیں جنگل باراں
لوکی تینوں سسٹر کہندے، کریں علاج بیماراں
تن دی کریں صفائی بہتی ایہہ تیری مجبوری
رکھناں خوش مریضاں تائیں ایہہ وی بہت ضروری
من دی کریں صفائی جئے توں پاویں قرب حضوری
عزت ہوسی تیری جیویں ہوندی نیکو کاراں
لوکی تینوں سسٹر کہندے، کریں علاج بیماراں
کونجاں وانگ اکٹھے رہنا رل مل کرو اوتارا
جتھے جائو لہر خوشی دی خوشیاں دا ورتارا
ہمدردی تے جذبے تیرے موہ لیا اے جگ سارا
تیرے نال ہے رونق سارے گھر تے وچ بازارں
لوکی تینوں سسٹر کہندے، کریں علاج بیماراں

تیرے ورگا حوصلہ مینوں کدھرے نظر نہ آوے
ہر دی گل ہس کے سن لیناں تیری شان ودھاوے
وچ مریضاں ٹرنا پھرنا بہتا درد گھٹاوے
تیرے اس جذبے نوں میں تے دیواں داد ہزاراں
لوکی تینوں سسٹر کہندے، کریں علاج بیماراں
ڈاکٹراں سنگ سہاندی ایں توں ، تاہیوں اوہ خوش رہندے
ول ول تیریاں کرن تعریفاں اک دوجے سنگ بہندے
ناز ادا تے نخرے تیرے نال خوشی دے سہندے
واہ وا دل نوں بھائی جاون تیریاں خوش گفتاراں
لوکی تینوں سسٹر کہندے، کریں علاج بیماراں
ویکھ اقبالؔ ایہہ سسٹر سیانی گجھیاں مرضاں جانے
ایہدے دارو نال تے یارو جاندے دکھ پرانے
نیک نمازی ، خدمت گار تے ہوئے فضل ربانے
اوہدی جے کر محفل بہیے کھڑکن دل دیاں تاراں
لوکی تینوں سسٹر کہندے، کریں علاج بیماراں