1689954541792_56117168
Not Available Free
177
کلی فقیر دی
فقیر دی کلی وچ آ کڑیے
تے ستڑے نصیب جگا کڑیے
کلی والے رستے نوں بھل نہیوں جاونا
بیلیاں تے جھنگیاں چ رل نہہیوں جاونا
شوق دا چراغ لَے کے سدھے جُل آونا
کلی والے سائیں نوں توں رہبر بنا کڑیے
کلی ول آونا توں چھپ کے چھپا کے
دنیاں دیاں نظراں توں بچ کے بچا کے
ویکھ لئیں ہر پاسے لمبی نگاہ پا کے
رستے وچ مکھ توں ناں چادر ہٹا کڑیے
کلی واے رستے تے ملے تینوں روشنی
کلی وچ آ ہُن گل نہ کوئی سوچ نی
لکھیا نصیب جیویں دیویں نہ توں دوش نی
کلی وچ ہک واری آ آزماء کڑیے
کلی ول سدھا ویکھیں دیوا ہوسی بلدا
جھنڈا مولیٰ علی والا کلی اُتے ہلدا
لگے اوتھے ڈر نہ تینوں کسے گل دا
کلی والے سائیں دی توں بردی کہلا کڑیے
کلی والے راہ اوتے بلدے چراغ نیں
کلی وچ آ کے توں ہونا باغ و باغ نیں
اوتھے آکے دھل جانے سارے تیرے داغ نیں
توبہ والی کلی وچ سر نوں جھکاء کڑیے
کلی والے رستے تے خطرے وی ڈھیر نیں
سپ شنہہ نالے رہندے ببر شیر نیں
مولا علی دا صدقہ ہون سارے زیر نیں
توں دل وچوں خوف نوں بھگاء کڑیے
کلی والی رات دے کئی وکھرے نظارے نیں
بھل ڈل جان غم جتنے وی سارے نیں
چن نال خوش رہندے جیویں ایہہ ستارے نیں
کلی والا لگا تیرے دل نوں ایہہ چاء کڑیے
کلی ول آوناں توں دنیا توں چوری اے
دروازہ نہیں او لنگنا تے لنگ آناں موری اے
جئے کوئی تینوں ویکھ لوے ناں دکھائیں کمزوری اے
راہ وچ کسے دا نہ دل توں دُکھا کڑیے
کلی والے رستے تے خوف تینوں آوے گا
کلی والا سائیں تینوں مکھڑا وکھاوے گا
بانہہ تیری پکڑ کے کلی ول لے جاوے گا
کلی والے رنگ وچ چنری رنگاء کڑیے
کلی ول ٹریں گی تے جھیڑے سارے مک جان گے
سپ شہنہہ سارے تینوں تک اوتھے رک جان گے
عیب پاپ سارے تیرے کلی وچ لک جان گے
دل تیرا ہووے گا صفن صفاء کڑیے
کلی ول آونا توں سج کے سجاء کے
گھر والے ساریاں نوں دس کے دساء کے
دینا لینا ہر دا توں دے کے دیواکے
کلی ول ٹرکے تے گل پچھے دی بھلا کڑیے
کلی وی فقیر دی تے توں وی فقیر دی
گل وات ہونی ایتھے درد دی ضمیر دی
پناہ سوہنے رب دی تے نالے وڑے پیر دی
ہن چادر نوں مکھ توں ہٹاء کڑیے
جاء ہن کڑیے توں داغ تیرے دھل گئے
کیتے جہڑے پاپ سی او ایتھے آکے ڈلھ گئے
آئے نہ او مڑکے جہڑے ایتھوں جل گئے
ایہہ دنیا ہے بڑی بے وفا کڑیے
کلی والی رات تینوں کدی وی نہ بھلے گی
جدوں آوے یاد ساڈی دھار کجلے دی ڈلے گی
بھیت اسرار والی بات ساری کھلے گی
پیاء دیوے درشن تینوں گھر آ کڑیے
کلی وچ رہن دی کوئی وکھری بہار اے
ایتھے صاف ہونا تیرے حسن دا نکھار اے
ہر کوئی تیرے نال کرے گا پیار اے
توں پیاء نال پیار نوں ودھا کڑیے
کلی والے سائیں باجھوں تیرا گزرے نہ جھٹ نی
جٹاں تے ارائیاں والی چھڈ کھٹ وٹ نی
دلڑی مونہہ لئی اے کشمیر والے بٹ نی
سوہنا جیویں راضی من لئے رضا کڑیے
کلی وچ آکے تے ہوویں نہ اداس توں
دھونے تیرے دھل جان کریں ناں قیاس توں
رب سوہنے کرم کیتا ہوگئی اج پاس توں
کلی والے سائیں تنیوں دتی ہے دعا کڑیے
قادری سائیںؔ کلی وچ جدوں وی توں آویں گی
گھر والی یاد ساری چھیتی وسر جاویں گی
کلی والے سائیں دی توں بردی کہلاویں گی
کلی وچ ریہہ ہن موج مناء کڑیے
ID | Chapters/Headings | Author(s) | Pages | Info |
ID | Chapters/Headings | Author(s) | Pages | Info |