اے خالقِ حقیقی ہویدا ہے تیرا نام
وردِ زباں ہے تو کہ جلیسا ہے تیرا نام
زخموں کا اندمال ہے ایسا ہے تیرا نام
یعنی مداوا رنج و الم کا ہے تیرا نام
واحد ہے، لاشریک ہے، یکتا ہے صرف تو
تیرے سوا نہیں کوئی مولا ہے صرف تو

یکتا صفات و ذات میں تو اور صرف تو
پختہ ہر ایک بات میں تو اور صرف تو
رہتا ہے دن میں، رات میں تو اور صرف تو
بچتا ہے کیا ثبات میں؟ تو اور صرف تو
بس تو ہی لم یزل بھی ہے اور لا یزال بھی
تیری مثال کیا ہو کہ ہے بے مثال بھی

بخشا ہے تو نے ہی مجھے ایقانِ حسنِ ذوق
تیری ولا سے پایا ہے عرفانِ حسنِ ذوق
تیری عطا نے بخشا ہے ایمانِ حسنِ ذوق
تیرا ہے یعنی سب سروسامانِ حسنِ ذوق
تو نے کیا ہے ذہن کو بیدار اے خدا
اس پہ کرم کہ کر دیا سرشار اے خدا