دیکھا، پڑھا، سُنا تھا کسی نے عرب کا حال
جس جا قبیح رسموں کا پھیلا ہُوا تھا جال
سچ کا تو سانس لینا تلک تھا وہاں محال
حق بات کیا ہے کس کو تھا اس بات کا خیال
دختر کشی، عناد و تفاخر کا راج تھا
طاقت نمائی، سود و زنا کا رواج تھا

اُس وقت کب کسی پہ عدالت کے سائے تھے
انصاف و عدل پر بھی علالت کے سائے تھے
جنگ و جدل کے اور ذلالت کے سائے تھے
اور علم پر بھی سارے جہالت کے سائے تھے
درگور زندہ بچیّاں کرتے تھے جبر سے
خوفِ خدا تھا اور نہ ڈرتے تھے قبر سے

آشوب ناک دور تھا ایسا کہ کیا کہیں
انسانیت کو اس طرح روندا کہ کیا کہیں
شیرازۂ حیات بکھیرا کہ کیا کہیں
چشمِ فلک نے اس طرح دیکھا کہ کیا کہیں
حُسنِ عمل کی اور مکمل شعور کی
اُس دور کو اشد تھی ضرورت حضورؐ کی