واضح نہیں ہوئی تھی ابھی شانِ کردگار
اُس وقت کب کسی کو تھی پہچانِ کردگار
پھر یوں ہُوا وہ لوگوں پہ احسانِ کردگار
خود کردگار کا تھا جو جانانِ کردگار
اُس کے زمیں پہ آنے کے آثار ہو گئے
اور معجزات تھے کہ نمودار ہو گئے

سچ ہی تھا مُطّلب کا وہ یعنی کہا ہُوا
پھر طیر کے وہ جُھنڈ نظر آئے باخدا
برساتِ سنگ کرتے وہ دشمن پہ جابجا
قہرِ خدا سے لشکرِ اعدا ہُوا فنا
اپنے حبیبؐ کے لیے ایسا سماں کِیا
دشمن تھے جتنے آپؐ کے عبرت نشاں کِیا

پھر یوں جنابِ آمنہ کا انکشاف تھا
جب سے شکم میں میرے ہے یہ نورِ باصفا
محسوس اس کا بار بھی ہوتا نہیں ذرا
سایہ کُناں ہے سر پہ مرے ٹکڑا ابر کا
پوشیدہ اس میں تھا یہی پیغامِ کبریا
یعنی نبیؐ کی ذات سراسر ہے معجزہ