اس گردشِ جہان کا مارا ہوا وجود
لے جائیں ہم کہاں بھلا ہارا ہوا وجود

جزوی سا جسم لے کے ہی پھرتے رہے ہیں ہم
اب آ کے تیرے لمس سے سارا ہوا وجود

آدم کی لغزشوں کی سزا سَہ رہا ہے اب
دیکھو بہشت سے یہ اتارا ہوا وجود

اشکوں کا رِس گیا تھا نمک آنکھ سے دروں
میٹھے سے جا کے یوں سبھی کھارا ہوا وجود

پوجا ہے آفتابِ محبت کو ایک عمر
تب جا کے خاک سے ہے ستارا ہوا وجود

ہر سوچ میری فہدؔ ہے کندن سی اس لیے
بھٹی میں عشق کی ہے نکھارا ہوا وجود