یہ ہنر آزما کے دیکھتے ہیں
اب کے اُن کو بھلا کے دیکھتے ہیں

رخ سے سرکے کبھی جو آنچل، ہم
معجزے اُس خدا کے دیکھتے ہیں

اب کے ہم بھی تو بے وفا ہو کر
جوش اُس کی وفا کے دیکھتے ہیں

کوئی اپنا نکل بھی سکتا ہے
ہاتھ سب سے ملا کے دیکھتے ہیں

درد میں آئے کچھ کمی شاید
آس کا گھر جلا کے دیکھتے ہیں

مل ہی جائے گا شعلۂ امید
گردِ اِیذا ہٹا کے دیکھتے ہیں

یاروں کی کھوجتے ہیں اب نیت
اپنا مقتل سجا کے دیکھتے ہیں

جو بھی ہوتا ہے خوش یہاں اُس کو
درد سے، منہ اُٹھا کے دیکھتے ہیں

جو بھی آتا ہے اُس گلی سے ہم
پاس اُس کو بٹھا کے دیکھتے ہیں