ضبط نے وحشتوں کو باندھا ہے
یعنی پھر آنسوئوں کو باندھا ہے

کس نے سب زندگی کی کڑیوں میں
درد کے سلسلوں کو باندھا ہے

تیرے باعث ہی دیکھ غزلوں میں
درد کے قافیوں کو باندھا ہے

یوں ہی روشن نہیں ہے دل اس میں
آس کے جگنوئوں کو باندھا ہے

درد نے ساز پھر سے چھیڑے ہیں
ہم نے بھی گھنگھروئوں کو باندھا ہے

دل کی باتیں سمجھ نہ پائے تم
ہم نے کب فلسفوں کو باندھا ہے

تیری زلفوں کی ڈور سے ہم نے
اپنے سب رتجگوں کو باندھا ہے