ڈھلتی سی شام کی جو ہوا چل پڑی تو پھر
اک اختتام کی جو ہوا چل پڑی تو پھر

دل کے محل میں چاہے دریچہ تو مت بنا
میرے ہی نام کی جو ہوا چل پڑی تو پھر

واعظ تو حبس وعظ سے جتنا بھی پیدا کر
مینا و جام کی جو ہوا چل پڑی تو پھر

تیرا خیال ہے کہ ہے یہ درد عارضی
درد دوام کی جو ہوا چل پڑی تو پھر

تو نے سمجھ لیا ہے کہ انمول ہے یہ حسن
اور سستے دام کی جو ہوا چل پڑی تو پھر

حاکم تجھے ہے خوف جو سچ کے نظام سے
گر اس نظام کی جو ہوا چل پڑی تو پھر