ہر غم ہنسی کے پیچھے چھپانے سے میں رہا
اس بار زندگی کو نبھانے سے میں رہا

دیتا بھلے ہے تیری جفا کا دھواں یہ اب
پھر بھی چراغ ِ عشق بجھانے سے میں رہا

اب ماند پڑ گئی ہیں مری سب حرارتیں
اس شخص کو تو روز منانے سے میں رہا

جن میں ہے تیرے لمس کی خوشبو بسی ہوئی
اے یار! اُن خطوں کو جلانے سے میں رہا

گر تیری شرط ہے کہ یہ حل ہوں گی اشک سے
ان مشکلوں پہ اشک بہانے سے میں رہا

ان سب اذیتوں نے تو پاگل ہی کر دیا
ہوش اپنے اب ٹھکانے پہ لانے سے میں رہا

حساسیت سے چیخ کے یہ کہہ رہا ہوں میں
گر یہ زمانہ ہے تو زمانے سے میں رہا

مانا کہ فہد ؔزندگی بھی ہے بہت کٹھن
پر آسماں تو سر پہ اُٹھانے سے میں رہا