وفا آزمانی نہیں جانتا تھا
کہ میں بد گمانی نہیں جانتا تھا

ترا شکریہ، تو نے سمجھا دیے ہیں
میں غم کے معانی نہیں جانتا تھا

زمانہ محبت کا دشمن رہے گا
محبت کا بانی نہیں جانتا تھا

ڈبو کر مجھے اُس نے خود ڈوبنا ہے
یہ دریا کا پانی نہیں جانتا تھا

اسی نے تو مجھ پر تھی انگلی اٹھائی
جو میری کہانی نہیں جانتا تھا

ترے لہجے کی نغمگی نے سکھا دی
کہ میں شعر خوانی نہیں جانتا تھا

مرے غم کی تصویر کیسے بناتا
مرے غم کو ’’مانی‘‘ نہیں جانتا تھا

جدا تن سے ہے کچھ یہ سر اس لیے بھی
میں گردن جھکانی نہیں جانتا تھا