قومی اتحاد
نحمدہ ونصلی علی رسولہ الکریم امّا بعد فاعوذ بااللہ من الشیطن الرجیم
بسم اللہ الرحمن الرحیم
معزز اسا تذہ کرام اور میرے ہم مکتب شاہینو!
آج مجھے جس موضوع پر اظہار خیال کرنا ہے وہ ہے:’’قومی اتحاد‘‘
جناب صدر!
واعتصموا بحبل اللہ جمیعا ولا تفرقو، تم سب مل کر اللہ کی رسی کو مضبوطی سے تھام لو اور تفرقہ میں نہ پڑو دینِ اسلام اس فرمان کی روشنی میں قومی اتحادکی تلقین کر رہا ہے۔ قومی اتحاد ملی وحدت کی ضمانت ہے۔
محترم صدر!
اتحاد جس شکل میں بھی موجود ہو قابل تحسین تصور کیا جاتا ہے، جوقوم ملی اتحاد کی دولت سے مالا مال ہوتی ہے وہ ہر لحاظ سے خوش و خرم ہوتی ہے، اس کی فضاؤں میں آلودگی نہیں ہوتی ، اس کے کھلیانوں میں خش و خاشاک نہیں ہوتے، اس کے بحر گرد جہالت سے خالی ہوتے ہیں، اس کے افراد کی عروق مردہ نہیں ہوتیں، اس کے میدان ویران نہیں ہوتے، اس کے ہسپتال آباد نہیں ہوتے۔
محترم صدر!
اتحاد جس قوم میں بھی ہو وہ دیگر اقوام میں ممتاز ہوتی ہے، اس کے وجود میں حسن اور نکھار پیدا ہو جاتا ہے۔ چند اینٹیں متحد ہو جائیں تو ایک مکان تعمیر کر دیتی ہیں، ایک عمارت بنا دیتی ہیں، ایک دیوار کھڑی کر کے بے پردہ گھر کو با پردہ بنادیتی ہیں، چند قطرے اکٹھے ہو جائیں تو ایک بحیرہ اور پھر بحر کی شکل اختیار کر لیتے ہیں، چند ذرّے اکٹھے اور متحد ہو جائیں تو ریگستان وجود میں آتا ہے۔
صدرِ ذی وقار!
اسلام میں اتحاد پر بہت زور دیا گیا ہے، حدیث نبویؐ ہے مسلمان مسلمان کا بھائی ہے، مسلمان مسلمان کو کبھی گالی نہیں دیتا، مسلمان مسلمان کو برا بھلا نہیں کہتا، اسلام کے زیور سے مرصعّ شخص معاشرے کے ماتھے کا جھومر ہوتا ہے، اس کے اندازنشست و برخاست معیاری ہوتے ہیں، اس کی گفتگو میں حسن ہوتا ہے وہ اتحادِملی کے جذبے سے سرشار ہوتا ہے۔
جنابِ صدر!
دنیائے رنگ و بو کے تمام مظاہر ہمیں اتحاد و یگانگت کا درس دے رہے ہیں۔ ستاروں کی روشنی تار یک شب کے اندھیرے چاک کر کے رکھ دیتی ہے ،سنگریزوں کے اکٹھے ہونے سے کوہسار جنم لیتے ہیں۔ بہت سے قطرے باہم مل کر سمندر کا روپ دھار لیتے ہیں۔ مختلف پھولوں کی ترتیب و تنظیم سے خوش نما اور خوش رنگ گلدستہ تیار ہوتا ہے۔ اسی طرح مسلمان اکٹھے ہو جائیں تو کفر کے تابوت میں آخری کیل ثابت ہو سکتے ہیں۔
ایک ہوں مسلم حرم کی پاسبانی کے لیے
نیل کے ساحل سے لے کر تابخاک کاشغر
جنابِ صدر!
مسلمان جب اکٹھے ہو جائیں تو در یائوں کی طغیانی کو ختم کر سکتے ہیں، بحر ظلمات میں اٹھنے والی عداوت وبغض کی موجوں کا رخ موڑ سکتے ہیں، اسلام کی طرف اٹھنے والی ہر میلی آنکھ کو پھوڑ سکتے ہیں، دین اسلام کے خلاف بولنے والی زبان کو گدی سے نکال سکتے ہیں، مسلمانان عالم کی طرف اُٹھنے والے ہاتھوں کوشل کر سکتے ہیں بشرطیکہ سب ایک ہو جائیں۔
بتانِ رنگ و خوں کو توڑ کر ملت میں گم ہو جا
نہ تُورانی رہے باقی نہ ایرانی نہ افغانی

صدرِذی وقار!
ہمارے اسلاف تھے جن سے کفر وشرک خائف تھا، جن کی للکار سے کفر و شرک کے ایوانوں میں زلزلہ آ جاتا تھا، جن کے کردار سے معاندین اسلام لرزہ بر اندام تھے، جن کی گفتار سے غیر مسلم قوموں کے در و دیوار میں دراڑ پڑ جاتی تھی ، آج ہم ہیں کہ ماضی کے برعکس ہر شعبہ حیات میں زوال و انحطاط کا شکار ہیں، جس کا سبب صرف اور صرف انتشار، افتراق، پھوٹ اور اختلاف ہے۔
گنوا دی ہم نے جو اسلاف سے میراث پائی تھی
ثریا سے زمیں پر آسماں نے ہم کو دے مارا
جنابِ صدر!
آج ہم ایک ہو جائیں، نیک ہوجائیں ،متحد ہو جائیں، انتشار ختم کر دیں ،متفق ہو جائیں، اختلاف ختم کر دیں، فرقہ واریت ، اقرباء پروری، رشوت ستانی، تعصب، خود غرضی ، بد دیانتی ، ملاوٹ ، ڈاکہ زنی، کے اژدہا کو محبت و مودت ، اخوت و بھائی چارہ اور اتحاد و اتفاق کے آہنی راڈ سے کچل دیں تو ہم حفظ حرم اور اسلام کی نشاۃ ثانیہ کا فریضہ بطریق احسن ادا کر سکتے ہیں۔
آج بھی ہو جو براہیم کا ایماں پیدا
آگ کر سکتی ہے اندازِ گلستاں پیدا

والسلام